As III Xornadas sobre o Paleolítico do Noroeste pretenden afondar no estudo das últimas comunidades de neandertais que poboaron Europa Occidental. Estas Xornadas son unha continuación dos cursos realizados en 2010 e 2017 en Triacastela, vencelladas ao desenvolvemento das investigación arqueolóxicas en Cova Eirós. 

  

Nesta ocasión, a temática das conferencias xirará arredor de varias cuestións relevantes que agrupamos en:

 

- O Paleolítico medio na Península Ibérica, onde se abordarán cuestións xerais (paleoambente, paleoantropoloxía, arqueoloxía, etc.) a través da presentación de xacementos ou investigacións actualmente en desenvolvemento.

 

- Modo de vida: estratexias de subsistencia, xestión dos recursos, sobre aspectos etnoarqueolóxicos, tecnolóxicos, zooarqueolóxicos, etc.

 

- Mundo simbólico e artístico: sobre as primeiras manifestacións simbólicas no rexistro humano, os rituais funerarios e outros aspectos que reflicten a complexidade conceptual dos Neandertais.

 

- Os derradeiros Neandertais, abordando a transición entre o Paleolítico medio e o superior nos diferentes territorios peninsulares, os métodos de estudo, os xacementos e problemáticas relacionadas coa desaparición dos neandertais e a expansión das primeiras comunidades de Homo sapiens na Península. 

 

Os seminarios estarán a cargo de especialistas da Península Ibérica, encargados de liderar proxectos de investigación vencellados ao estudo dos modos de vida dos Neandertais (Paleolítico medio).

 

Esta visión multidisciplinar fai o seminario de grande interese para os estudantes dos Graos de Historia, Humanidades, Bioloxía e Xeografía, así como para outro alumnado do SUG. Así mesmo, os docentes do Ensino Secundario atoparán neste seminario novos materiais para afondar nunha etapa, o Paleolítico, á que se lle adican poucas horas na planificación docente.

 

Finalmente, o seminario busca tamén a divulgación científica, é dicir, achegar a todas as persoas interesadas no tema as últimas novidades sobre o mundo Neanderthal, ó fío das recentes descubertas e mantendo sempre un tono didáctico e próximo.